Göngum í skólann verkefnið fer vel af stað en alls 71 skólar eru skráðir til þátttöku í verkefninu.

Víkurskóli og Brekkuskóli hafa báðir sett myndir á heimasíðuna en þátttökuskólar eru einmitt hvattir til þess að senda myndir, frásagnir og/eða myndbönd af verkefninu.

 Brekkuskóli hefur einnig sett inn frásögn af því sem þau hafa gert í tilefni af verkefninu. Þau byrja skólaárið greinilega vel með fjölbreyttri útiveru nemenda en eftirfarandi er frásögn sem kom frá þeim: "Byrjuðum september á einstaklega vel heppnuðum útivistardegi þar sem nemendur nutu náttúrunnar í sól og yndislegu veðri. Eldri nemendur gátu valið um að ganga á Súlur, fara í hjólaferð og sund eða að ganga um bæinn og skoða útilistaverkin í bænum undir handleiðslu listakennara. Í september erum við með útiíþróttir og þá kynnum við fyrir þeim svæði sem hægt er að leika sér á í nágrenninu. Förum vel yfir umferðareglur með yngstu nemendur og sýnum þeim öruggustu leiðir í kringum skólann".

Brekkuskóli nýtir nærumhverfið og hugmyndarflugið til þess að virkja börnin til göngu sem er til fyrirmyndar. Við vonumst til þess að fá fleiri skemmtilegar frásagnir og myndir af því sem fer fram í skólunum í tilefni af verkefninu.